കോട്ടയം: ഏറ്റുമാനൂര്‍ മഹാദേവക്ഷേത്രത്തിലെ ചരിത്ര പ്രസിദ്ധമായ ഏഴരപ്പൊന്നാന ദര്‍ശനം ഇന്നു നടക്കും. രാത്രി ആസ്ഥാന മണ്ഡപത്തില്‍ എഴുന്നള്ളുന്ന ഏഴരപ്പൊന്നാനയെ കണ്‍കുളിര്‍ക്കെ കാണാനും കാണിക്കയര്‍പ്പിക്കാനുമായി ആയിരക്കണക്കിന് ഭക്തര്‍ ക്ഷേത്രസന്നിധിയിലെത്തും.

        ആസ്ഥാന മണ്ഡപത്തില്‍ ഇരുവശത്തും ഏഴരപൊന്നാനയെ അണിനിരത്തി ഏറ്റുമാനൂരപ്പന്റെ തിടമ്പു വച്ച തങ്കശോഭയിലാണ് വലിയ കാണിക്ക. ചെങ്ങന്നൂര്‍ പൊന്നുരുട്ടമഠത്തിലെ പണ്ടാരത്തിലിന്റെ പ്രതിനിധി ആദ്യ കാണിക്ക അര്‍പ്പിക്കും ക്ഷേത്രത്തിലെ അറയ്ക്കുള്ളിലാണ് ഏഴരപ്പൊന്നാനയെ സൂക്ഷിക്കുക. ഏട്ടാം ഉത്സവത്തിനും ആറാട്ടിനും മാത്രമാണ് ഇത് പുറത്തെടുക്കുന്നത്. രണ്ടടി ഉയരമുള്ള ഏഴാനയും ഒരടി ഉയരമുള്ള കുട്ടിയാനയുമാണ് ഏഴരപ്പൊന്നാന. ഏഴരപ്പൊന്നാന അഷ്ടദിഗ്ഗജങ്ങളെ പ്രതിനിധാനം ചെയ്യുന്നു. കാര്‍ത്തിക തിരുനാള്‍ മഹാരാജാവ് 7143 കഴഞ്ച് സ്വര്‍ണ്ണം കൊണ്ട് നിര്‍മ്മിച്ച ഏഴരപ്പൊന്നാനയെ നടക്ക് വച്ചതെന്നാണ് ഒരു ഐതിഹ്യം. എന്നാല്‍, മാര്‍ത്താണ്ഡവര്‍മ്മ മഹാരാജാവ് 926ല്‍ ഏഴരപ്പൊന്നാനയെ നടക്കു വെച്ചതാണെന്നും വിശ്വാസമുണ്ട്.

       രാത്രി 12നാണ് ആസ്ഥാനമണ്ഡപത്തില്‍ ഭക്തര്‍ക്ക് ഏഴരപ്പൊന്നാന ദര്‍ശിയ്ക്കാന്‍ അവസരമുള്ളത്. 9 മണി മുതല്‍ തിരുവരങ്ങില്‍ സിനിമാതാരം രചന നാരായണന്‍കുട്ടിയുടെ ശാസ്ത്രീയ നൃത്തമുണ്ടാകും.