പത്തംനംതിട്ട: ശബരിമല ക്ഷേത്രത്തിലെ മണ്ഡല, മകരവിളക്ക് മഹോത്സവത്തിന് പരിസമാപ്തി കുറിച്ച് നടയടച്ചു. രാവിലെ അഞ്ചരയ്ക്ക് ഗണപതി ഹോമത്തിനു ശേഷം തിരുവാഭരണം പന്തളം കൊട്ടാരത്തിലേക്ക് തിരിച്ചയച്ചു. തുടര്‍ന്ന് വിഭൂതി കൊണ്ട് അയ്യപ്പനെ മൂടി യോഗനിദ്രയിലേക്ക് നയിച്ചു. ശേഷം ആറരയ്ക്ക് നടയടച്ചു. ഉത്സവത്തിന് സമാപനം കുറിച്ച് ഇന്നലെ രാത്രി മാളികപ്പുറത്ത് ഗുരുതി നടന്നു. ഭക്തര്‍ക്കുള്ള ദര്‍ശനം പൂര്‍ത്തിയാക്കി രാത്രി ഒന്‍പതിന് ഹരിവരാസനം പാടി നട അടച്ച ശേഷമാണ് ഗുരുതി നടത്തിയത്. വൈകിട്ട് ദീപാരാധനയ്ക്ക് ശേഷം പടിപൂജ ഉണ്ടായിരുന്നു. ഇത്തവണ മണ്ഡല, മകരവിളക്ക് കാലം അഭൂതപൂര്‍വ്വമായ ഭക്തജനതിരക്കിനാണ് സാക്ഷ്യം വഹിച്ചത്. ഇനി കുംഭമാസ പൂജക്കായി ഫെബ്രുവരി 12ന് വൈകുന്നേരം നട തുറക്കും.