കണ്ണൂര്‍: ലഹരി വസ്തുക്കള്‍ വാങ്ങാന്‍ പണം നല്‍കാത്തതിന് മകന്‍ അമ്മയുടെ ഇരു കൈകളിലും വെട്ടി പരിക്കേല്‍പ്പിച്ചു. കണ്ണൂര്‍ വടക്കേപൊയ്ലൂരിലാണ് സംഭവം . വടക്കേയില്‍ ജാനുവിനെയാണ് മകന്‍ നിഖില്‍ രാജ് വെട്ടി പരിക്കേല്‍പ്പിച്ചത്. അമ്മയ്ക്ക് പരാതിയില്ലെന്ന് പറഞ്ഞതിനാല്‍ കേസെടുത്തില്ലെന്ന് പോലീസ് പറഞ്ഞു.

പോലീസ് വീട്ടിലെത്തി മകനെ വൈദ്യപരിശോധനയ്ക്ക് കൊണ്ടുപോകാനുള്ള ശ്രമത്തിലാണെങ്കിലും അമ്മയ്ക്ക് പരാതിയില്ലായെന്ന് അറിയിച്ചതോടെ പോലീസ് വെട്ടിലായി.

ബാറുകളില്‍ അടിയുണ്ടാക്കിയ കേസുകളുള്‍പ്പടെ നിഖിലിന്റെ പേരിലുണ്ട്. ഇയാള്‍ സ്വന്തം കൈകളിലും കുത്തി പരിക്കേല്‍പ്പിച്ചിട്ടുണ്ട്. മകനോട് ക്ഷമിച്ചെന്നും പരാതി നല്‍കാന്‍ തയ്യാറല്ലെന്നുമാണ് അമ്മ ജാനു പറയുന്നത്. നിഖിലിനെതിരെ വധശ്രമത്തിനുള്‍പ്പെടെ കേസെടുത്ത് മറ്റ് നിയമനടപടികള്‍ സ്വീകരിക്കാമെങ്കിലും അമ്മ പരാതി നല്‍കാത്തത് സാങ്കേതികമായി തടസ്സം സൃഷ്ടിക്കുന്നുണ്ടെന്ന് പോലീസ് പറയുന്നു.