മലപ്പുറം : വിവാഹം കഴിഞ്ഞ് ഒരാഴ്ച മുൻപു നാട്ടിൽനിന്നു ജോലി സ്ഥലമായ കശ്മീരിലത്തിയ സൈനികൻ ലഡാക്കിൽ മരിച്ചു. ആർമി പോസ്റ്റൽ സർവീസിലെ ശിപായി കീഴുപറമ്പ് കുനിയിൽ കോലോത്തുംതൊടി നുഫൈൽ (27)ആണു ദേഹാസ്വാസ്ഥ്യത്തെത്തുടർന്നു മരിച്ചതായി ബന്ധുക്കൾക്കു വിവരം ലഭിച്ചത്.8 വർഷമായി സൈന്യത്തിൽ സേവനമനുഷ്ഠിക്കുന്ന നുഫൈൽ രണ്ടു വർഷമായി കശ്മീരിലാണ്. ഡിസംബർ അവസാനം നാട്ടിലെത്തിയിരുന്നു. ഈ മാസം 2ന് മുക്കം കുളങ്ങര സ്വദേശിനിയുമായി വിവാഹം കഴിഞ്ഞ് 22ന് ആണു മടങ്ങിയത്. കോയമ്പത്തൂരിലേക്കു സ്ഥലം മാറ്റം പ്രതീക്ഷിച്ചിരിക്കെയാണ് വിയോഗം. വ്യാഴം രാവിലെ 10.30നു പ്രതിശ്രുത വധുവിനെ വിളിച്ചിരുന്നു. രാത്രി ഒൻപതരയോടെയാണു മരിച്ചതായി വിവരം ലഭിച്ചത്. പിതാവ് മുഹമ്മദ് കുഞ്ഞാൻ നേരത്തേ മരിച്ചു. ഉമ്മ ആമിനയും നുഫൈലിന്റെ സഹോദരിയുമാണു കുനിയിലെ വീട്ടിലുള്ളത്. അസം, മേഘാലയ എന്നിവിടങ്ങളിലും സേവനമനുഷ്ഠിച്ചിരുന്നു. മൃതദേഹം നാട്ടിലെത്തിക്കുമെന്ന് അറിയിച്ചിട്ടുണ്ട്.