തിരുവനന്തപുരം: സഹപാഠി നൽകിയ ആസിഡ് കലർന്ന ജ്യൂസ് കുടിച്ച് ആറാം ക്ലാസ് വിദ്യാർത്ഥിയുടെ ആന്തരികാവയവങ്ങൾക്ക് പൊള്ളലേറ്റു. രണ്ട് വൃക്കകളുടെയും പ്രവർത്തനം നിലച്ച വിദ്യാർത്ഥി മരണത്തോട് മല്ലിടുകയാണ്. കേരള തമിഴ്‌നാട് അതിർത്തിയിൽ കന്യാകുമാരി ജില്ലയുടെ കീഴിൽ വരുന്ന കളിയിക്കാവിള മെതുകുമ്മൽ നുള്ളിക്കാട്ടിൽ സുനിലിന്‍റെയും സോഫിയയുടെയും മകൻ അശ്വിൻ (11) നെയ്യാറ്റിൻകരയിലെ സ്വകാര്യ ആശുപത്രിയിൽ ജീവനുവേണ്ടി പൊരുതുകയാണ്. കഴിഞ്ഞ മാസം 24നാണ് സംഭവം നടന്നത്. കൊല്ലങ്കോടിന് സമീപം അതംകോട് മായാകൃഷ്ണ സ്വാമി വിദ്യാലയത്തിൽ പഠിക്കുന്ന അശ്വിൻ, പരീക്ഷയെഴുതി ശുചിമുറിയിൽ നിന്ന് മടങ്ങുമ്പോൾ സഹപാഠി ശീതളപാനീയം നൽകിയെന്നും എന്നാൽ രുചിയിൽ വ്യത്യാസം തോന്നിയതിനാൽ കുറച്ച് മാത്രമാണ് കുടിച്ചതെന്നും വീട്ടുകാരോടും പൊലീസിനോടും പറഞ്ഞു.