ദോഹ: ബന്ധം സാധാരണ നിലയിലാക്കുന്നതിനുള്ള തുടര്‍ പ്രക്രിയയില്‍ ഖത്തറും ബഹ്റൈനും മെയ് 25 മുതല്‍ ഇരു രാജ്യങ്ങളും തമ്മിലുള്ള വിമാന സര്‍വീസുകള്‍ പുനരാരംഭിക്കുന്നു. ബഹ്റൈനിലെ സിവില്‍ ഏവിയേഷന്‍ അഫയേഴ്സ് കഴിഞ്ഞ തിങ്കളാഴ്ചയാണ് നീക്കം പ്രഖ്യാപിച്ചതെന്ന് ബഹ്റൈന്‍ സ്റ്റേറ്റ് ന്യൂസ് ഏജന്‍സി റിപ്പോര്‍ട്ട് ചെയ്തു.
ഇരു രാജ്യങ്ങളും തമ്മിലുള്ള ഫ്‌ലൈറ്റ് പുനരാരംഭിക്കുന്നത് രണ്ട് സഹോദര രാജ്യങ്ങളും ജനങ്ങളും തമ്മിലുള്ള സാഹോദര്യ ബന്ധത്തിന്റെ ചട്ടക്കൂടിനുള്ളിലാണെന്നും ഇരു രാജ്യങ്ങളിലെയും നേതൃത്വങ്ങളുടെയും പൗരന്മാരുടെയും പൊതു അഭിലാഷങ്ങള്‍ നേടിയെടുക്കുന്ന രീതിയിലുമാണ്'', സ്റ്റേറ്റ് ഏജന്‍സി പറഞ്ഞു.
സൗദി തലസ്ഥാനമായ റിയാദിലെ ഗള്‍ഫ് സഹകരണ കൗണ്‍സില്‍ (ജിസിസി) ജനറല്‍ സെക്രട്ടേറിയറ്റിന്റെ ആസ്ഥാനത്ത് ഏപ്രില്‍ 12 ന് അതാത് വിദേശ പ്രതിനിധികള്‍ കൂടിക്കാഴ്ച നടത്തിയപ്പോഴാണ് ഗള്‍ഫ് രാജ്യങ്ങള്‍ ബന്ധം പുനഃസ്ഥാപിക്കുമെന്ന് പ്രഖ്യാപിച്ചത്.